Psalms 149
Loxompixan Emi Asu
1Leemi asu ri Leeme Silok!Mina vixan loxom pixan maxat ti emi asu mi Leeme Silok; mina emi asu min to at lovotpot buru atnedi limixin ua di ruturun tin! 2Nemi leme Israel, minak lek mumu laradi runtudum li atnemi; nemi limixin me Saion mina momo mumu mo Loorong Silok atnemi! 3Mina tii momo ri emi asu mi laasen teren; mina pasa levengkuvu eburu mi leven gita ri emi asu min.
4Leeme Silok in tuuna ka lomomo mumu limixin teren; im taba asen silok tinedi ua dik lok atnaasan la imtaba di mi lolos ti sak tup mi lavamunepen atdi. 5Limixin at ne Moroa dina momo mi leepang silok atla diga sev asi nedi, la dinak pixan momo maraanu rinotno at lengkanimin axap. 6Naba lox avukat do dinap kup silok at loxonaleng dina emi asu mi ne Moroa, la dinam tebeng levenise esep sengsen atnedi, 7kusu tik sak tup mi levenabung mixin petpes, la rik lox asongot di, 8la kusu ri koxo lavaorong atnedi mi lempat sen, la mo lubung amgomgo atnedi bok mi lempat sen aen. 9Na lempanga naba ravasu kusu ri lok li liina mavana at levenabung mixin petpes ngan ne Moroa gara vit li vam i. Nai i ngan lugugu at limixin at ne Moroa kuren la dinaba lok kaka laasen silok (lokox asinorong) teren.
Leemi asu ri Leeme Silok!
Copyright information for
MMX